Dagli: Pera na Naging Bato pa!

Pera na Naging Bato pa!

Ramon Miranda

Jessieto A. Abener

Rhodona Tugna

Kristofer E. Canillas

Jennifer Rama

“Nasaan na ang titser na ‘yan? Ipapapulis ko siya!”

“Huminahon po kayo, ano ang problema?” “Basta, ipapapulis ko siya. Tingnan ninyo kung ano ang nangyari sa anak ko.” Hindi napahupa ng malamig na kuwarto ang nagpupuyos  na damdamin.

Habang naghihintay ng sasakyan papuntang presinto, inutusan niya ang anak na bumili ng yosi. “Ate! Ate!” naririnig niyang tawag sa kanya. “Bakit?” Nakauwi na po ba ang anak ninyo? May bumato po kasi sa amin kanina habang pauwi. Natamaan po sa ulo ang anak ninyo.”

Pagkarinig sa sinabi ng bata, biglang bumagsak ang kaniyang balikat

Dagli: TANTSO

TANTSO

Nakangudngod ang mukha niya sa dingding ng kubeta. Hindi makapalag. May busal ang bibig. Hawak sa magkabilang balikat ng bordadong kalalakihan. Naramdamang napunit ang kanyang pagitan. Tawanan. Hagalpakan. Napasubsob. Nanlabo ang paningin. “Putang inang ‘to titser pa naman”.

“Matagal na kaming may relasyon. Mahal ko po siya pero hinding-hindi ko mapapatawad ang ginawa niya sa akin. Hindi ko inaakalang magagawa niya sa akin iyon. Halimaw siya. Demonyo si sir!” salaysay ng Grade 9 student.

Dagli: TRIP TO ABROAD

TRIP TO ABROAD

Nakasusulasok na amoy ang sumalubong sa mga estudyante, isang umaga. Tinunton ng mga titser kung saan nanggagaling ang amoy. May isang estudyanteng sumigaw. “Sir, dito po nanggagaling ang amoy.” Nakasarado ang pinto ng CR. Hindi naman ito magawang buksan dahil mahigpit na bilin ng bruskong principal na huwag itong ipapagamit. Pinuntahan ng mga titser ang Assistant Principal para hingin ang susi. Walang maibigay dahil nasa loob ng opisina diumano ng principal ang susi nito. 

Alam ng lahat na nasa labas ng bansa ang principal kasama ang iba pang opisyal ng Dibisyon.

May nagsusukang estudyante na at ang iba’y nahihilo dulot ng masangsang na amoy. Nagdesisyon na ang ASTP na destrongkahin ang pinto. Pinagtulungan tadyakan ng dyanitor at guro ang pinto. Napakaraming langaw ang nabulabog. Tumambad ang katawan ng isang lalaking nakasuot ng barong. Nakasubasob ang mukha sa inidoro, may nakabaon na kutsilyo sa tagiliran at mayroong karatulang nakasabit sa leeg “OUT OF ORDER.” 

Dagli: Teacher Bailer

Teacher Bailer

Ni Ana Basas

“Ano? Dala mo na ba  ang pang pyansa”? Makakalabas na ba  ako dito? Sunud-sunod na tanong ni Michael. 

“ Sa makatlo pa daw ibibigay ni Bombay eh’.  

‘Lintek na buhay talaga ‘to oh!”

Mabibigat ang hakbang ni Gng. Briones habang tinatalikuran ang anak, tumutulo ang luhang inaalala niya ang pag-uusap nila noon na kanyang kaibigan. 

“ Bakit tayong mga titser ‘no, mabuti pa ang ibang bata  natuturuan natin, napapayuhan natin pero, mismong mga anak natin ni hindi na nga natin sila kilala eh! “Dinedma lang niya noon ang  tinuran ng kaibigan.

Dagli: A Hundred Shoes

A Hundred Shoes

A classmate would always brag about her hundred shoes. I doubt. She would go to school with her feet slipped on the same shoes everyday – old and dirty. 

A week of absence made us pay her a visit. On their door, hung a black cloth and guilty of eavesdropping, “The old man gave up the battle without having sold even just a pair.” 

There and then I knew what my classmate says is true.

ALAALA NG TDC ART WORKSHOP SA BAGUIO

ALAALA NG TDC ART WORKSHOP SA BAGUIO

Ni Kristina Ku

Sa isip binabalikan ang daang bumati

Pasayaw-sayaw, gumigiri-giri

Tila kumpas ng pendulum ng orasang antigo

Nawika ko, nandito na nga ako sa Baguio.

Paghalik ng bagahe sa bulwagang Quirino,

“Gala tayo”, ang yaya ko.

Pagkakatao’y sinamantala, sa palengke’y pumunta

Kakulita’y sumirit, damay-damay, kapit-kapit

Di alintana ang hagibis ng langit.

Nagkakarerang pawis, nagmumula sa langit

Walang balak magpatalo, dumadaloy ng malupit

Hindi ko mabilang, tunog ng tikatik

Binibigyang ritmo, kalaro kong mga titik

Mga mukhang may bukas-bagong kuhang PEI

Babaunin yaong kasiyahang taglay

Pagsali sa workshop, wika’y napamahal

Di malilimot, kakulitang kay sir Eros at sir Jowie ay taal.

SAMPUNG LIBO LAMANG

SAMPUNG LIBO LAMANG

Ni Jayson A. Cruz

Sampung libo lamang, tangi naming hiling,

Tangi naming hiling, sampung libo lamang

Kumpara sa bilyong, iskandalo ngayon.

Iskandalo ngayon, higit sampung bilyon.

Silang nagpakasasa, sa b’wis na winaldas.

Silang mambabatas, sa guro’y utang ang talas.

Bakit hanggang ngayo’y bantulot sa batas

na sa buhay nami’y magbibigay lakas.

Sampung libo lamang, tangi naming hiling,

Tangi naming hiling, sampung libo lamang

Kumpara sa bilyong, iskandalo ngayon.

Iskandalo ngayon, higit sampung bilyon.

Ilang dekada na guro ‘y nagmamartsa

Sa Batasan, Senado, DBM at Mendiola?

Ilang Mila pa, hahandusay sa bangketa

upang makita nila, abang lagay ng maestra?

Sampung libo lamang, tangi naming hiling,

Tangi naming hiling, sampung libo lamang

Kumpara sa magagara nilang mga sasakyan,

nagtatayugang mga bahay at ari-arian.

Kaming namamaos upang kabataa’y maiayos,

Kaming nagpupuyat sa pagbalangkas ng leksiyon,

Kaming bumubuhay sa mga pangarap at ambisyon,

patuloy na isinasantabi’t suweldo’y binubusabos.

Kailan pakikinggan, aming panawagan?

Kailan ibibigay aming munting hiling?

Kailan kikilalanin, malaking ambag namin

Kung patay na kami’t nabaon na sa utang?

Sampung libo lamang, tangi naming hiling,

Tangi naming hiling, sampung libo lamang

Makatarungang umentong malapit sa katotohanan

Pakikurot naman nang kaunti, sa kaban ng bayan.

Nais din naming mabuhay nang may dignidad

Ibig din naming mabuhay nang marangal

Huwag n’yo naman kaming ituring na hangal

Basahin n’yo ang bibliya, ang guro ay banal.

Sampung libo lamang, tangi naming hiling,

Tangi naming hiling, sampung libo lamang

Makatarungang umentong malapit sa katotohanan

Pakikurot naman kami nang bahagya, sa kaban ng bayan.

June 1, 2014

3:46 AM

SMV. Binangonan

Tulang binigkas sa rally ng TDC sa Rajah Soliman Park, Malate, Manila at iba pang consultation forum ng samahan bilang panawagan sa sampung libong umento sa sahod ng mga guro sa bansa.