MANGARAP AT KUMILOS

MANGARAP AT KUMILOS

ni Ramon B. Miranda

Nais mong maabot lipunang malaya

Ibig mong makamit kaginhawaan ng madla

Nangarap kang ang lupa’y ibigay sa timawa

At masaganang buhay para sa manggagawa.

Paano mo mararating ang pangarap na ito

Kung bulag ka sa nangyayari sa paligid mo

Tainga mo nama’y bingi sa karaingan ng tao

Di mo pinapansin ang kanilang pagsusumamo.

Pananaw mo sa buhay, bakit ba ganyan?

Nais mong tumulong ikaw nama’y nag-aalinlangan

Ikaw ba’y natatakot iyong karapata’y ipaglaban?

O iniisip mo lamang ang sarili mong kapakanan?

Kung sa dibdib mo’y takot ang namamahay

Pangarap mong lipunan di maipagtatagumpay

Kaya nakasalalay sa iyong mga kamay

Taos-pusong pakikilahok sa pakikibaka ng buhay.

Kaibigan halina’t mag-aral at mag-isip

Tayo nang bumangon sa pagkakaidlip

Karapatan natin kailangang masagip

Sa kuko ng mapagsamantala, gahaman at sipsip.

Sa sistemang bulok, huwag aksayahin

Itong kinabukasang tinataglay natin

Ang ating mga teorya’y dapat pagyamanin

Buhay ay gugulin sa magandang adhikain.

Gawaing pagmumulat ay mahirap talaga

Sanlaksang pilosopo sa iyo ay dadagsa

Kung magtitiyaga ka lamang sa pag-oorganisa

Hanay ay mabibigkis, lipunan ay lalaya.

Nasa pagkilos ang ating paglaya

Hindi sa pangarap at patunga-tunganga

Kung hindi ngayon, kailan pa

Kaya kilos na, baka masayang ka!

TDC Leaders Dialogue with DBM Official for Salary Increase

Kasabay ng World Teachers' Day Celebration sa Cuneta Astrodome, Pasay City, nakipagdiyalogo naman ang ilang Lider ng Teachers' Dignity Coalition sa Department of Budget and Management noong Lunes, October 5, 2015. Pinangunahan ito nina TDC Sec-Gen Emmalyn Policarpio, TDC-Caloocan Vice Chair Jaime Albiza, TDC Taguig Leader Michael Rama,TDC-Caloocan Leaders Meng Arevalo at Bong Lagarde.

Naging paksa ng diyalogo ang Salary Increase ng mga Guro na noon pa hinihingi at inilalaban ng TDC. Ayon kay DBM Asec Myrna Chua, siguradong may dagdag SAHOD tayo sa 2016 dahil naglaan na ng pondo na 50.6 Bilyong Piso ang ahesnya para sa Salary Standardization Law 4 o SSL4 para sa taong 2016 na proposal pa rin hanggang sa kasalukuyan.

Dagdag ni Chua, sa panukalang dagdag sahod, hindi totoo ang 5%, 10% o 15% na kumakalat na balita dahil wala pang ina-aprubahang batas ang Kongreso ukol dito ni ang dokumento para sa iskema ng salary increase.

Nauna nang kumalat ang tatlong bersyon ng Salary Increase mula sa Senado at itoý ang 10k Across-the-Board, 25k at 29,800 na sadyang muntik nang magpalinlang sa mga kaguruan ng bansa. 

Inaasahan naman ng TDC na maging makatotohanan na ang Salary Increase ng mga guro sa lalong madaling panahon para naman makatulong ito ng malaki lalo na sa mga gurong nabaon na sa utang dahil sa kakulangan ng sahod. Magiging daan din ito para sa mas maayos na pamumuhay ng kaguruan dahil mas makakayanan na nila ang mataas na matrikula ng mga may anak na nagaaral sa kolehiyo

TDC Leaders, Dumalo sa DepEd Forum

Dumalo ang ilang lider ng Teachers'Dignity Coalition sa pangunguna nina Ramon B. Miranda, TDC Vice Chair for South Luzon, Ildefonso Enguerra III, TDC NCR Chairperson at Michael Rama, TDC Taguig Leader, sa forum na ginanap sa Buwagan ng Karunungan, DepEd Cental Office, kahapon, October 6, 2015. Konektado ito sa selebrasyon ng World Teachers'Day sa bansa na may paksang Empowering Teachers and Building Sustainable Development.

Sa forum, nagbigay ng inspirational message si dating CHR chair Loretta Ann P. Rosales at naging focus naman ng mensahe ni CHED Executive Director Atty. Julito D. Vitriolo at E-Net Philippines Vice President Prof. Flora Arellano ang Education Policies and Programs in Empowerig Teachers in Building Sustainable Societies.

Si Ms. Estrella Soriano, isang preschool teacher, ang nagsalita naman para sa Boses ng mga Guro habang sa Alternative Learning System o ALS nakatutok ang mensahe ni Ms. Carol Doyanan, isang guro. Bilang tugon, sinabi ni DepEd Usec Dina Ocampo, "Teacher must reach the unreachable children by mean of community education through ALS."

Bago nagtapos ang forum nagbigay ng synthesis and call to action si PUP Prof. Amable Tuibeo. Nagbigay ng pagkilala sa kabayanihan ng mga gruo, cultural representation, interpretative dance, song number at natapos sa pagbibigay sertipiko sa mga gurong dumalo.

TDC - SINAG Group, Matagumpay ang pagtatanghal sa Cuneta Astrodome

Matagumpay ang pagtatanghal ng Teachers'Dignity Coalition- SINAG Group sa Cuneta Astrodome, Pasay City, nitong Lunes, October 5, 2015. Kasabay ito sa selebrasyon ng World Teachers Day sa bansa.

Maraming lider at miyembro ng TDC mula sa Metro Manila at karatig na probinsya ang dumalo sa nasabing selebrasyon upang ipakita ang pakikiisa nito sa Kagawaran ng Edukasyon na nais bigyan ng pagkilala ang malaking ambag at halaga ng mga guro sa bansa.

Nagbigay naman ng maikling mensahe si TDC National Chair at Ating Guro Partylist First Nominee Benjo Basas sa mga dumalo sa lugar. Sa halos pitong minutong pananalita, binanggit nito ang ilang problemang kinakaharap ng mga guro sa bansa kasabay ng pabigat na RPMS at hindi makagurong pagpapabaya ng gobyerno para itaas ang sahod ng kaguruan. Nabanggit din ni Benjo na mismong siya ay nakakaranas ng paghihirap dala ng hindi magandang pagpapahalaga ng gobyerno sa mga makabagong bayani ng bayan - Ating mga Guro!

TDC / Ating Guro, Sama-samang Nagdasal sa Quiapo Church

Magkakasabay na nagsimba ang Teachers'Dignity Coalition Leaders at Members sa Quiapo Church noong Biyernes, October 4, 2015, upang ipagdasal ang kaguruan ng bansa. Pinangunahan ito ni TDC National Chair at Ating Guro Partylist First Nominee Benjo Basas upang ipakita ang pagkakaisa ng mga guro para ipanalangin ang mga kahilingan at katuparan ng mga matagal na nitong pinanawagan sa gobyerno.

Ipinaglalaban kasi ng TDC at Ating Guro Partylist ang pag-apruba ng Salary Increase na noon pa dapat ipinatupad. Maliban pa rito, ipinanawagan din ang pagsuspinde ng K-12 dahil hindi pa handa ang bansa para humarap sa panibagong problema lalo't ipapatupad na ang senior high school sa mga paaralan sa bansa sa susunod na taon. Pinatitigil din ng TDC ang pagpapatupad ng RPMS dahil pabigat ito sa ating kaguruan at maging ang hindi malinaw na pamantayan ng Performance-Based Bonus ay kinokontra rin.

Inaasam ng grupo na magiging pabor ang mga susunod na panahon para sa mga ipinaglalaban ng mga guro upang maging maayos ang kalagayan nito na may dangal at desenteng pamumuhay.

Benjo Basas on the Tagged Video

Narito ang sagot ni Teachers' Dignity Coalition / Ating Guro Partylist First Nominee Benjo Basas ukol sa kumalat na video na kinasangkutan ng guro ng Baesa High School sa kanyang estudyante kung saan siya ay naka-TAG kamakailan.

"Sa FB friends ko sa dalawang accounts, tungkol sa tagged video sa akin nitong mga nkalipas na araw, pasensiya na at agad kong inalis iyon.

(PS-Paunang Sabi, ngayong umaga ay may interview din ako sa GMA-7 pero tungkol naman ito sa election duty ng public school teacher at malayung-malayo sa usaping ito.)

Biyernes nang may mag-pm sa akin sa Benjo Ating Guro Basas ukol sa video na hindi ko naman agad napanood dahil sa cp lang ito pumasok. Gayunman, agad kong inalis ang video na tagged sa akin ng isa sa mga alumni noong 90s. Sabado ay may magkasunod na tag sa akin, again mula sa mga alumni noong 90s din na agad ko ring inalis (ang hindi ko naialis agad ay yung tagged sa Ser Benjo AtingGuro Basas, ang account ko na para sa mga batang friends at Baesa HS alumni). Linggo nang umaga ng tawagan ako ng GMA 7 at humingi ng reaksiyon, nag-decline ako dahil una hindi ko pa napapanood ang video. Ikalawa parang mahirap magbigay ng komentaryo sa isang bagay na napakalapit sa iyo. Naunawaan naman ako ng reporter bagamat muli niya akong kinumbinsi early afternoon, muli akong tumanggi. Late afternoon ng ako’y pabiyahe papuntang San Rafael, Bulacan ay muli siyang tumawag at hihingin na lamang umano ang aking reaksiyon, generally sa ganitong mga insidente bilang TDC Chair, nagpaunlak ako ng panayam sa telepono (na tila hindi naman lumabas) upang maipahayag ang paggigiit ng due process sa mga ganitong kasong kinasasangkutan ng mga guro. Pagkatapos lamang nito ay saka ko napanood ang video sa magandang celfone ng isang kasama sa Bulacan. Gabi naman nang may tumawag sa akin na opisyal ng DepEd at humihingi sa akin ng detalye na hindi ko naman kayang naibigay. Yun ang pagkakataon na nag-text ako sa aking principal upang tumawag sana sa kanya, pero hindi rin kami nagkausap.

Narito ang aking dahilan kung bakit ko ito agad na inalis:

1. Ang pananatili nito sa aking profile ay nangangahulugan ng consent sa video tagged. At kung magkagayon, magiging conflict ito sa aking kasalukuyang trabaho- hindi pa bilang teacher sa Baesa HS kundi bilang National Chairman ng Teachers’ Dignity Coalition (TDC), organisasyong may panatang ipagtanggol ang karapatan ng mga guro. Bagamat ang pag-upload sa nasabing video ay isang paraan ng pagresolba sa isyu, ito’y hindi naayon sa due process. Hindi sa ipinagtatanggol ko ang guro na nasa video, subalit may mga establisadong panuntunan ang DepEd na dapat sinusunod sa mga ganitong insidente.

2. Habang kumakalat ang video ay lalong nagiging maselan ito hindi lang para sa guro kundi pati na rin sa bata o mga batang sangkot. Hindi naman maayo na nasa aking account ang mga ganitong video lalo ngayong ipinagdiriwang pa naman natin ang National Teachers’ Month at World Teachers’ Day sa October 5. 

Umaasa ako sa pagtatapos ng usaping ito sa lalong madaling panahon.

HAPPY TEACHERS’ DAY!

-BENJO BASAS

TDC / ATING GURO FIRST NOMINEE"

Sa video kasing kumalat, nakunang maingay ang mga estudyante sa classroom (nagtetext, susulat / drawing ng bagay sa blackboard, naghaharutan at iba) at sa kasalukuyang pag-iingay ay biglang pumasok ang isang babae na mukhang nanenermon at pinuntahan ang dalawang lalaking student sa kaliwang bahagi sa bandang dulo ng upuan. Hindi naman nabanggit kung ano ang ginagawa ni hindi rin nakunan ng video ang ginagawa ng dalawa. Sa galit ng babae, nagbabala ito na gagamit ng masamang salita hanggang marinig mula sa kanyang bibig ito... sabi niya, "gusto mo bang marinig sa mga guro niyong magmumura? putang-ina niyo!... matapos yun ay parang may hinawakan siya sa bandang balikat. Patuloy pa rin ang kanyang panenermon hanggang matapos ang video.

Habang nangyayari ang insidente ay tila hindi tinatablan ang mga estudyante dun, parang normal lang ang ganoong proseso sa kanila... ni hindi sila natitinag sa sermon? ganyan naba ang estudyante ngayon? imbes na magbasa ng kanilang libro o anumang sulatin para matuto e nagkukwentuhan? then kapag nanenermon ang guro o makapagbitaw ng masakit na salita e ipapahiya sa madla? dapat ang kinakasuhan dito e yung nag-upload ng video... hindi man lang niya naisip na mapapahiya ang babae lalo't kung guro man yun... ni hindi naisip ng nagupload ng video na may kalakip na kaso ang ginawa niya? 

Hindi rin naman tama ang ginawa ng guro sa insidente, mas maige na palampasin muna niya ang kanyang galit bago humarap sa magugulong estudyanteng ganun... para hindi makagawa ng bagay na hindi gusto ng lahat. Pero hindi rin tamang ganun na lang lapastanganin ang papel ng guro dahil may mga estudyante talaga na tila galing sa burak na kabihasnan na hindi alam ang tamang respeto at tamang lugar... ni hindi rin ata alam na ang eskwelahan ay lugar para mag-aral ng aralin at hindi lugar para magkwentuhan at maglaro.

TDC on October 5 - World Teachers' Day Celebration at Cuneta Astrodome

Makikiisa ang Teachers 'Dignity Coalition / Ating Guro Partylist kasama ang SINAG / Cultural Group sa gaganaping World Teachers Day Celebration sa Cuneta Astrodome sa darating na lunes sa susunod na buwan, October 5, 2015, kung saan posibleng daluhan ito ng libu-libong mga guro at iba pang kawani ng Kagawaran ng Edukasyon.

Bilang bahagi ng pagdiriwang, magtatanghal ang SINAG / Cultural Group ng TDC sa hapon, mula ala-una hanggang matapos. Ang itatanghal ay hango pa rin sa mga natutunan ng mga guro mula sa huling seminar - workshop sa Baguio City ng TDC.

Ayon kay TDC / Ating Guro Partylist First Nominee Benjo Basas, ang pakiisa ng mga guro sa nasabing selebrasyon ay pagpapakita ng kahalagahan at hindi matatawarang kakayahan ng mga guro sa bansa. Kasama rin sa plano ng grupo ang pakikipag-diyalogo sa Department of Budget and Management Secretary Butch Abad para sa SALARY INCREASE ng mga guro.

Kaya naman, hinihikayat ng grupo ang mga guro sa bansa lalo na sa National Capital Region na makiisa sa panawagan ng TDC para sa pagtaas ng sahod maging ang pagtutol sa kalabuan ng PBB/PEI at di makatarungang pagpapatupad ng RPMS.

Kasalukuyang naghahanda ang SINAG members para sa nalalapit na pagtatanghal sa pangunguna nina Jayson Cruz ng Mandaluyong at Anthony Cruz ng Malabon. Sa Huwebes, October 1, 2015, 1-5PM, naka-reset ang rehearsal sa Quezon City Division Office.